ആഗോള സുരക്ഷാ
ഭൂപടത്തിൽ സമാധാന ദൂതുമായി ഇന്ത്യയുടെ സാന്നിധ്യം വീണ്ടും അടയാളപ്പെടുത്തപ്പെടുന്നു.
ലബനനിലെ ഐക്യരാഷ്ട്രസഭയുടെ സമാധാന ദൗത്യത്തിൽ (UNIFIL) ഫീമെയിൽ എൻഗേജ്മെന്റ് ടീം കമാൻഡറായി പ്രവർത്തിച്ച ഇന്ത്യൻ കരസേനയിലെ മേജർ അഭിലാഷ ബരാക്ക്, 2025-ലെ ഐക്യരാഷ്ട്രസഭയുടെ ‘മിലിട്ടറി ജെൻഡർ അഡ്വക്കേറ്റ് ഓഫ് ദ ഇയർ’ പുരസ്കാരത്തിന് അർഹയായി.
ഇന്ത്യൻ സൈന്യത്തിലെ
ആദ്യത്തെ വനിതാ കോംബാറ്റ് ഹെലികോപ്റ്റർ പൈലറ്റെന്ന ചരിത്ര നേട്ടത്തിന് പിന്നാലെയാണ്, ലോകവേദിയിൽ ലിംഗസമത്വത്തിനായുള്ള പ്രവർത്തനങ്ങളുടെ പേരിൽ ഈ ആഗോള അംഗീകാരവും അവർ സ്വന്തമാക്കുന്നത്.
ഐക്യരാഷ്ട്രസഭയുടെ
സമാധാന സേനാംഗങ്ങളുടെ ദിനത്തിൽ പ്രഖ്യാപിക്കപ്പെട്ട ഈ നേട്ടം, ഇന്ത്യൻ സൈനികരുടെ മാനുഷികവും നയതന്ത്രപരവുമായ ഇടപെടലുകളുടെ കരുത്തിനെ ലോകത്തിന് മുന്നിൽ വീണ്ടും വെളിപ്പെടുത്തുകയാണ്.
വെറും സൈനിക
ദൗത്യത്തിനപ്പുറം, ഒരു നയതന്ത്രജ്ഞയെപ്പോലെയാണ് മേജർ അഭിലാഷ ലബനനിലെ സ്ത്രീകളുടെ ഇടയിൽ പ്രവർത്തിച്ചത്.
5,000-ത്തിലധികം
പേരുമായി നേരിട്ട് സംവദിച്ചുകൊണ്ട്,
അവിടുത്തെ
സ്ത്രീകളുടെയും പെൺകുട്ടികളുടെയും ജീവിതത്തിൽ വിദ്യാഭ്യാസം, ആരോഗ്യം, തൊഴിൽ തുടങ്ങിയ മേഖലകളിൽ വ്യക്തമായ മാറ്റം കൊണ്ടുവരാൻ അവർക്ക് സാധിച്ചു.
ഈ മാനുഷിക ഇടപെടലാണ് ഐക്യരാഷ്ട്രസഭയുടെ ഏറ്റവും വലിയ അംഗീകാരത്തിന് വഴിയൊരുക്കിയത്.
ഇന്ത്യൻ കരസേനയിലെ ആദ്യ വനിതാ കോംബാറ്റ് ഹെലികോപ്റ്റർ പൈലറ്റെന്ന നിലയിൽ അതീവ സങ്കീർണ്ണമായ സൈനിക ദൗത്യങ്ങളിൽ മികവ് തെളിയിച്ച മേജർ അഭിലാഷ ബരാക്ക്, ഇപ്പോൾ സമാധാന ദൗത്യരംഗത്തും അതേ പ്രവർത്തനശേഷി കാഴ്ചവെക്കുന്നു. പോർമുഖങ്ങളിലെ സാങ്കേതിക വൈദഗ്ധ്യത്തിനൊപ്പം തന്നെ, സംഘർഷ മേഖലകളിലെ മാനുഷിക വെല്ലുവിളികളെ നേരിടാനുള്ള അവരുടെ കരുത്തുറ്റ നേതൃത്വമാണ് ഈ ആഗോള അംഗീകാരത്തിലൂടെ വ്യക്തമാകുന്നത്.
മേജർ അഭിലാഷ ബരാക്ക് ഇന്ത്യൻ കരസേനയുടെ ചരിത്രത്തിൽ ആദ്യത്തെ വനിതാ കോംബാറ്റ് ഹെലികോപ്റ്റർ പൈലറ്റായി കമ്മീഷൻ ചെയ്യപ്പെട്ടത് 2022 മെയ് മാസത്തിലാണ്.
2022 മെയ് 25-ന് നാസിക് ആസ്ഥാനമായുള്ള കോംബാറ്റ് ആർമി ഏവിയേഷൻ ട്രെയിനിംഗ് സ്കൂളിൽ (CATS) വെച്ച് നടന്ന ചടങ്ങിൽ, കോംബാറ്റ് ആർമി ഏവിയേഷൻ കോർപ്സിലേക്ക് യോഗ്യത നേടിയ 36 പൈലറ്റുമാർക്കൊപ്പം മേജർ അഭിലാഷയും തന്റെ ‘വിങ്സ്’ (Wings) ഏറ്റുവാങ്ങിയിരുന്നു.
സൈനിക
മികവിനൊപ്പം തന്നെ, സംഘർഷ മേഖലകളിലെ ജനങ്ങളുമായി ആശയവിനിമയം നടത്താനും അവരുടെ പ്രശ്നങ്ങൾ പരിഹരിക്കാനും ഇന്ത്യൻ സൈനികർ കാണിക്കുന്ന താൽപ്പര്യം ആഗോളതലത്തിൽ ഇന്ത്യയുടെ പ്രതിച്ഛായ ഉയർത്തുകയാണ്.
