ന്യൂഡൽഹി: ജന്തർ മന്തറിൽ വീണ്ടും സമരം ആരംഭിക്കുമെന്ന CJPയുടെ (Cockroach Janata Party) മുന്നറിയിപ്പിനെ തുടർന്ന് ഡൽഹി പോലീസ് പ്രദേശത്ത് സുരക്ഷ ശക്തമാക്കി. പ്രതിഷേധം വീണ്ടും ആരംഭിക്കാനുള്ള സാധ്യത കണക്കിലെടുത്ത് ജന്തർ മന്തറിന് ചുറ്റുമുള്ള ഇരുമ്പ് ബാരിക്കേഡുകൾ വെൽഡിംഗ് ചെയ്ത് കൂടുതൽ ഉറപ്പിക്കുകയും Rapid Action Force (RAF) ഉൾപ്പെടെ അധിക സുരക്ഷാസേനയെ വിന്യസിക്കുകയും ചെയ്തു.
ജൂലൈ 25-ന് കേന്ദ്രസർക്കാരുമായി നടത്തിയ ചർച്ചയിൽ പ്രതിഷേധക്കാർക്കെതിരായ കേസുകൾ പിൻവലിക്കുമെന്ന ധാരണ ഉണ്ടായിരുന്നെങ്കിലും അത് പാലിച്ചില്ലെന്നാണ് CJPയുടെ ആരോപണം. രാജ്യത്തുടനീളം പ്രതിഷേധക്കാർക്കെതിരായ FIR-കൾ പിൻവലിക്കണമെന്നും അറസ്റ്റിലായ വിദ്യാർത്ഥികളെ മോചിപ്പിക്കണമെന്നും സംഘടന ആവശ്യപ്പെട്ടു. ആവശ്യങ്ങൾ നടപ്പാക്കാത്ത പക്ഷം വീണ്ടും സമരത്തിലേക്ക് കടക്കുമെന്ന് CJP ദേശീയ വക്താവ് അശുതോഷ് റങ്ക അറിയിച്ചു.
അതേസമയം, ജന്തർ മന്തർ പ്രതിഷേധങ്ങൾക്ക് അനുവദിച്ചിരിക്കുന്ന സ്ഥലമായതിനാൽ അവിടെ നിയമ-സമാധാന സാഹചര്യം നിലനിർത്തുന്നതിനായി സുരക്ഷാ ക്രമീകരണങ്ങൾ തുടരുമെന്ന് ഡൽഹി പോലീസ് അറിയിച്ചു. സാഹചര്യം നിരന്തരം നിരീക്ഷിച്ചുവരികയാണെന്നും അനിഷ്ട സംഭവങ്ങൾ ഒഴിവാക്കാൻ മുൻകരുതൽ നടപടികൾ സ്വീകരിച്ചിട്ടുണ്ടെന്നും പോലീസ് വ്യക്തമാക്കി.
